Trolltunga ligg 1100 moh. om lag 700 meter over Ringedalsvatnet. Her er fantastisk og luftig utsikt! Turen er lang, krevjande og går i høgfjellet.

Det er merka sti til Trolltunga. Frå parkeringsplass P2 i Skjeggedal (hovudstartpunktet) er det 28 km t/r, ein høgdeskilnad på ca. 1200 m og estimert gangtid er 10-12 timar tur/retur. Turen kan og starte frå P1 i Tyssedal og P3 på Mågelitopp. Det går og shuttle-bussar mellom Odda og Skjeggedal, og mellom parkeringsplassane P1, P2 og P3.

Langs stien til Trolltunga er det skilt som viser kor langt du har gått og kor langt det er att. Det er 4G- dekning med Telenor-nett store delar av turen. Fotturen til Trolltunga er anbefalt frå starten av juni (avhengig av når snøen smeltar) og ut september.

Det er viktig å vurdere om ein er i god nok form og har godt nok utstyr. All naturbasert aktivitet er på eige ansvar. Er du uerfaren med krevjande fjellturar bør du være med på guida tur. Trolltunga Active og Trolltunga Adventures tilbyr guida turar. Frå 16. februar kan ein bli med på guida truge- eller skitur med Trolltunga Active.